حين انبهر السفير السعودي بالطفل المصري

-
طبعا مش حاقولكم على تربيتي لاولادي
اكيد لما انا امهم يبقى حيكونوا عاملين ازاي
راجع البلوج من اوله صفحة واحد لغاية اربعين تعرف انا كنت ازاي وانا طفلة
مش راح اطول في الحتة دي لان حتتعرف في الآخر
مرة من ذات المرات اتعزمت على العشاء عند العلامة الاستاذ الشيخ عبد الله شحاته رحمه الله رحمة واسعة وادخله الجنة وانا معاه يارب
زوجة الاستاذ كانت اجتماعية ولطيفة وكنت باحبها قوي وكانت عازمة السفير السعودي على العشاء وعشمانه انها تجيب عيلة مصرية ترفع راسها قدام الاجانب
انا لبست الاولاد ووقفتهم قدامي واحدة في رابعة ابتدائي وواحد في اولى ابتدائي
بصوا ياولاد
انا ما يهمنيش اللي موجودين ومحبش قلة الادب
لو حد منكم اتكلم بطريقة وحشة بالقلم على وشه قدام الناس كلها
لو حد اكل يايده حاشتمه
لو حد اتصرف تصرف كدة والا كدة حاجيب سيرة لما قام ولقيت السرير مبلول
عايزة الناس تفتكر انكم مؤدبين
محدش يعاكس اخوه
محدش يشتكي من اخوه والا قسما عظما لا نادي ولا فسحة ولا مصروف ويمكن مش بعيد ينام في الشارع النهاردة مفهوووووووووم
الاولاد الاتنين عينيهم دورت بقت قد طبق الفاكهة مش مصدقين
يالا باحبكم قوي
وصلنا عند الشيخ عبد الله بدري وسلموا على الناس بمنتهى الادب والاخلاق
ولما وصل السفير بنتي سلمت بمنتهى الرقي وابني وشه في الارض
ايه الجمال ده
لا وشوفوا لما ققدوا على السفرة تبارك الله فيما خلق
ااكل بالشوكة والسكينة وبصيت لابني وهو بيقول لاحته ممكن لو سمحتي تقربيلي الكوباية وهي ترد حاضر
وبعد العشا قعدنا قدام التليفزيون وهم عايزين يتفرجوا على الكارتون اللي بيبوه وبيبصولي من تحت لتحت
وكنا في كومباوند جامعة السلطان قابوس يعني ممكن يروحوا البيت لوحدهم
قلت لزوجة الشيخ عبد الله
انا اعتقد ان الاولاد ممكن يروحوا عشان بكرة مدرسة
قالت يا حبايبي ربنا يخليهملك يارب انا مشفتش كدة
سلموا بأدب على الكل السفير وزوجته والشيخ وزوجته ووصلتهم للباب
وقفلت الباب وسمعنا كلنا
هييييييييه هيييييييه وصريخ كان واحد كان في السجن وطلع
طبعا انا عارفة ان دول اولادي بس رجعت وبصوت هادي جدا
الظاهر فيه اولاد في الشارع انا خايفة لحسن الاولاد يتعلموا منهم الهرجلة وقلة الادب
عايزة اقولكم ان بعد ما روحت السفير السعودي قال للشيخ عبد الله انا ما شفتش اولاد بالادب والتهذيب ده
روحت البيت لقيت الهدوم على الارض والنوتيلا على الكرسي والاولاد بيتنططوا بالجزمة على الكنبه ولكن نظرا لانهم وطدوا العلاقات المصرية السعودية سامحتهم وش

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد