المساعدة الطبية الاولية تكون لاصحاب المعالي السفراء

-

 المساعدة الطبية الاولية تكون لاصحاب المعالي السفراء

لم اجد فيمن عرفت رقة قلب ابنتي الحبيبة فهي تخاف على البشرية كلها وتناقشني في وسائل حماية هذا وذاك كيف ان ما يحدث سيسبب كارثة هنا وما يفعله هذا يسببه اذى له ولغيره وكنت اساعدها على ان تنمي هذا الشعور بل واساعدها على ان تستفيد من هذا الشعور لخدمة الآخرين ولذلك قمت بتقديم اوراقها لتتعلم المساعدات الطبية الاولية وذلك في مدرسة للغطس وايضا انضمت هي الى محاضرات في كلية الطب لتتعلم منهم وسائل المساعدات الطبية الاولية
كانت تحضر الدورة وهي مستمتعة وانهتها بسعادة واتت ومعها كارنية الحضور
انا الآن يمكنني ان اساعد الناس ومعي ما يثبت اني على دراية بالمساعدات الاولية
- طيب يا ستي
- تعاليلي بقى
واردت ان اريها انا المساعدة لا تكون بان تريد بل بان تفعل
- اعتبريني عم متولي
والعم متولي هو جنايني يتميز بالملبس الرث ومثال الرجل الذي يعتبر ان معدنه في قلبه الطيب مش في هدومة المطينة واسنانة الصفراء او ايديه السوداء واكيد واحدة في الجامعة موضوع الاسنان الصفراء بتعمل مفعول السحر
- انا عم متولي ولقيتيني واقع على الارض في الشلالات
والشلالات هي الجنينة اللي قدام بيتنا
- حتعملي ايه وريني
ورحت رامية نفسي على السرير وباطلع في الروح
راحت نطت جنبي على السرير وقالت بكل ثقة
don't worry , I am hear to help you
- نعم ياختي
هلب يو ، هو عم متولي حيفهم اللي بتقوليه
- مامي ما تتيريقيش
- انا مش باتريق انا باقولك انا عم متولي وتعبان وعايزة اللي يساعدني
- خلاص فهمت
راحت نطت جنبي على السرير ومن بعيد جدا قالت
- ما تخافش يا عم متولي انا هنا عشان اساعدك
- انت حاسس بايه
قلت لها يا ستي هو مغمى عليه
- مامي لو سمحتي هو انتي مش مصدقة اني حاعرف
قلتلها يا بنتي الموضوع ده لازم تعملي حسابك عليه لو عايزة تساعدي ناس
وانتهت انها قالتلي لازم اجيب جوانتي عشان لما اساعد حد يبقى من غير ما اتعدي انا كمان ما هو ممكن يكون عنده كبد وبائي والا حاجة
وخلصنا اليوم ده واذ فجأة تصادف ان اليوم اللي بعده وهي راجعة من الكلية شافت حادثة وواحد واقع على الارض
راحت ضربت فرامل ووقفت العربية بسرعة ونزلت وهي بتجري على مكان الراجل وبتقول للناس
- I am a certified helper
- ابعدوا خلوه يتنفس
وبالطبع الشعب اللي واقف جنبه كله بعد وبقى بينها وبينه مثلث هو الراس وهي القاعدة
وشافت المنظر
راجل تقريبا عينه واقعة على خده والدم على وشه
عاااااااااااااااا
ايه ده دم ، وواحد ما اعرفوش ممكن يكون عنده كبد وبائي
بصت للناس اللي حواليها وقالتلهم
- عايزة قماشة نظيفة
بسرعة كام واحد اللي جاب فوطة صفراء بتاعة التاكسي بتاعه واللي جاب حتة خرقة كانت على الارض جنبه واللي طلع منديل نافف فيه لما قاطع نفسه
بصت للقماش اللي جايبينه وتقمصت دور الطبيبة
- ايه ده دي حتت مش مطهرة انتم عايزين تموتوه
في تلك الاثناء ولحسن حظها الشديد انها سمعت فيه اسعاف جاية وصوت وييي واااا وييي واااا
قالتلهم
- الاسعاف جت ياللا ابعدوا من جنبه عشان الاسعاف تشوف شغلها
وششششششش
ده صوتها وهي بتجري على العربية عشان تروح
ودخلت البيت وهي وشها اصفر وبتترعش
- فيه ايه يا بنتي
ده انا اللي باقول
- ابدا يا مامي شفت حادثة وواحد متعور ودم
- وعملتي حاجة
- يامامي مكانش معايا الجوانتي والراجل ممكن يعديني لان الدم بتاعه ممكن يكون ملوث والناس قال ايه جايبن فوطة صفراء عشان يمنعوا الدم، لكن الحمد لله ان الاسعاف جت في الوقت المناسب
- يالا عشان تتغدي عملالك لحمة بفتيك تستاهل بقك واهو فرصة تحكيلي حصل ايه
- اتغدى !!!!! انسي انا مش ممكن اكل لحمة بتاع للسنة الجاية كدة والا اقولك نباتية افضل

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد