انا غارة

 علشان ما تضايقوش على كام ساعة ظلام

انا من سنوات كتيرة جاءت لي حساسية من الضوء و اتمنعت من الشمس تماما

و كنت لازم ابقى في الظلام حتى الصبح لازم الشيش و الستائر

كان أي ضوء ممكن يتسبب لي في حروق في وجهي و صداع نصفي و قيء مستمر

قعدت كدة شهور

ما اقدرش أخرج برة البيت حتى بالليل

و كنت مسمية نفسي

غارة

اول ما اقرب اقول لهم

طفوا النووور طفوا النووور غارة غارة

كان ضوء شاشة الكمبيوتر يعمل لي حروق

اخذتها بروح حلوة و لا اتضايقت و لا زعلت

اعتبرتها فترة أتخلص فيها من ادمان الكمبيوتر و الجلوس أمامه ساعات

. ووقف معايا احلى ناس و كانوا بيقعدوا معايا في الضلمة نحكي و نهزر و نضحك ربنا ما يحرمني منهم

بعد الفترة دي رجعت بالتدريج للحياة العادية و بعد تلك الفترة بسنوات طويلة فوق العشرين سنة و زيادة باخرج في الشمس عادي جدا و حياتي جميلة

الحاجة الحلوة أن اخويا راح الحج باسمي وقتها لأني ما اقدرش احج لما فيه من مجهود و عدوى و أشعة شمس شديدة

يعني و انا في بيتنا قافلة النور كنت باحج

ده لإن ربنا بيحبني و قال لي حتروحي تحجي في نفس السنة اللي ما تقدريش تفتحي شباك

ما تقلقوش من اي حاجة لأنها بتعدي

انا باقول للناس أن ثلاث ساعات في اليوم نعتبرها تصفية ذهن و راحة ونحمد الله اننا نقدر نمشي في النور بعد كدة