خففني شكرا

 فيه ناس بتتعامل مع الصدقات زي ما بتتعامل مع الصيدلية

داووا مرضاكم بالصدقات يقوم يطلع صدقة و يعتبر ان المريض لازم يخف

التعامل مع الله و رسوله لازم بأدب و لازم يبعد عن الندية فسبحان الله عما يصفون

الصدقة دي مش دواء بياخدها العيان يخف

العيان حيخف لما يخف انما الصدقات ده ادب مع الله و حب في الله و اللي بيعمل صدقة مش المفروض يستنى الرد و كمان في الوقت بتاعه

ما ينفعش ( ولله المثل الاعلى ) تجيب هدية لحد و تقول له مستنيك بكرة تردي الهدية دي لو سمحت

حاقول لكم عن قصة قرأتها و أثرت في جدا

مرة كان فيه واحد قاعد في جنينة و كان جنبه فراشة بتطلع من الشرنقة بتاعتها

شايفها بتحاول تطلع و تيجي يمين و شمال و حاسس انها بتتعذب

قرر يساعدها فاخذها و جاب مقص و قص الشرنقة علشان تطلع بسهولة

اكتشف ان جسم الفراشة اللي داخل الشرنقة ضخم لسة و ان الفراشة مش حتقدر لا تطير و لا تمشي و ان خروجها من خرم الشرنقة بيعصر السائل اللي فاضل في جسمها علشان لما تطلع تطير

فضلت الفراشة كسيحة لا تستطيع ان تطير و لا تسير

و عرف ان فيه قدر ربنا مقدره لكل مخلوق و ساعة لكل حدث و ان مساعدته للاسراع بالحدث تسبب في ان تتعذب الفراشة و تموت كسيحة

الرد من الله في الوقت اللي يقرره الله مش اللي انت عايزة و لا بالطريقة اللي عايزها

تأدب مع الله

ودي موجودة بشكل جميل قوي في سورة الحجرات في القرآن لما بتقول

اعوذ بالله من الشيطان الرجيم

بسم الله الرحمن الرحيم

يَا أَيُّهَا الَّذِينَ آمَنُوا لا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ