والله لاقول لاأمكم

على قدر حناني وحبي لكل من حولي ولكن مصلحتهم تكن اولى وابدى في كل وضع
يعني بالبلدي لو الموضوع ضد مصلحة شخص لا يمكن اطبطب لازم اتنمر وتصل الى ان اقسو
وبالتالي كنت اقص القصص واطهو اجمل الوجبات وادلع وادادي ولكن عند الجد معنديش هزار
كان زوجي بالعكس
يكفهر بسهوله ويبتسم بحساب وقسوته كانت في الشكل واحيانا تنبع من قلة العطاء العاطفي فقط
وكنا نجلس انا وزوجي ليحدثني عن الاولاد
الواد مش عاجبني بيهزر كتير
البنت مش عاجباني رفيعة ومش بتاكل
الولد مش عاجبني ما صلاش العصر
البنت مش عاجباني بتعاكس اخوها
وفي مرة فضل يشحني على الاولاد لما بقيت مش قادرة انتظر وكنت عايزة اكلهم من كتر الغضب فتركته وكنا وقتها ساكنين في فيلا وبالتالي الاولاد في الدور الفوقاني
قمت عشان اروح امارس امومتي في التوبيخ والضرب ولقيت جوزي بيجري يسبقني على فوق
وعلى ما وصلت للاولاد لقيته واقف وحاطط ايده زي اللي في مبارايات كرة السلة علشان ما اوصلش للمنطقة المهمة الا وهي منطقة وجود الاولاد
وبيقول لي خلاص خلاص هم كويسين ومش حيعملوا كدة تاني
وانا عمالة احاول اوصل لاي حد منهم عشان اضربه وهو مصر انه يمنعني
طبعا الاولاد كانوا فوق بيلعبوا ولا على بالهم ان فيه حد بيشتكي منهم مر الشكوى
ولا ان مامتهم اتحفزت ضدهم وعايزة تضرب
هم كانوا بيلعبوا وفجأة لقوا ابوهم جاي يمنع امهم من الوصول اليهم وهي مصرة تضرب
مش حاقولكم المفاجأة كانت عاملة ازاي
انما انا ساعتها قعدت اضحك وبطلت وبصيت له في عينيه وقلت له
مش انت اللي كنت بتشتكي منهم
قال لي بس مش لدرجة الضرب يعني ممكن تربيهم من غير ضرب
بعد عدة اشهر ولقيت تحسن ضئيل في سلوك الاولاد ومش عارفة منين ولكن مرة دخلت علي الاولاد ولقيت ابوهم بيقول لهم
والله لاقول لمامتكم
عرفت ان اليوم التاريخي كان بداية التربية بالترهيب
لو عملتوا اي حاجة وحشة
حاقول لامكم الغولة