الغروب اهم من العريس

 وانا في اخر سنة في الكلية وكنت لم ارتبط باي انسان وكان هناك عريس يريد ان يرتبط بس انا ايه عايزة اكمل الماجستير والدكتوراه واعمل ابحاث عالمية واخد نوبل علوم قبل ما ارتبط ، اهو احلام شباب
المهم ان فيه عريس اتكلم مع والدي وهو اعجب بيه جدا وقال لي يابنتي طمنيني عليكي وانا مش حابعتك تدرسي برة الا لما تلبسي دبلة في ايدك
وانا قلت طيب
المهم ان والدي اتوفى قبل ما يكلمني هذا العريس ومسكتني مامتي مسكة اللي هي
باقولك ايه دراسة وكلام فاضي ما ينفعنيش
تتجوزي يعني تتجوزي
كل الكلام ده ومعه لغة جسد كلها تهديد وتحفز وانا بالطبع الكلام ده بيعمل معايا شغل جامد يعني بمعنى اصح بيخوفني موت
رديت بادب وقلت لها طيب لما يكلمني حاوافق بس لما يكلمني
وتعمدت ابعد من سكنه لانه كان دكتور في الكلية
المهم انه اتكلم وطلب يقابلني
حاخلي موضوع المقابلة في مرة تانية
لكن لما طلب يكلم ماما
قلتله تعالى على طول
اخذ معاد وجاء وكان والدي متوفي وعندي اخويا الكبير
اول ما دخل البيت وقابل اخويا الكبير وسلم عليه وقعد معاه شوية
ولسة الراجل ما قالش كلمة
قام اتنطر اخويا وقال له
انا اسف لازم انزل حالا عشان الحق الغروب
سكت العريس وقال ما شاء الله عيلة متدينه الراجل عايز يصلي المغرب في الجامع
وجاءت والدتي وتمت الجوازة
وبعدين قال لي جوزي
هو اخوكي بطل يصلي في الجامع ليه
ايه اللي خلاك فاكر انه بيصلي في الجامع
قال لي ما هو اول مرة زرتكم سابني عشان يلحق المغرب
قلتله لا هو كان عايز  يلحق الغروب
قالي ايه حكاية  الغروب ده
قلت له اصله كان عايز يصور الشمس وهي بتغرب
وسكت وما علقش لانه كان اتدبس في العيلة دي خلاص لا مفر