الرقة و الوداعة ما تأكلش عيش
ذكريات 75
طبعا نظرا لرقتي الشديدة بين اصدقائي فكنت مثال الفتاة الرقيقة المهذبه و المثل الاعلى لكل الاسر المنتجة والغير منتجة
لكن الحقيقة ان في كانتين المدرسة مكانش ينفع الرقة و من فضلك ولو سمحتي لان ساعة الراحة كله بيندفع بسرعة عايز يلحق يشتري و ياكل ويخلص قبل الجرس
المهم ان انا كنت دايما استنى دوري بادب شديد و لما يبقى فاضل دقيقتين على الجرس ابتدي ازق وانادي و انا عايزة وامد ايدي و يقع مني المصروف بالسرعة البطيئة تحت رجلين بنات بنات بنات ومين يقدر يزحف تحت هذا الحشد الهائل من البنات اللي ما كلوش من الصبح
ولذلك قررت عمل مسابقة جميلة بين البنات وهي لعبة الرست
عارفين الرست طبعا
اقعد انا وقدامي بنت
واخدين بالكم بنت
قصاد مين
انا و اعوذ بالله من قولة انا
ويالا اديني ايدك يا شابة
وهوبا تلاقي نفسها اتغلبت
وده لان انا عندي اتنين كباتن في البيت طول النهار بيغلبوني لدرجة ان انا فكرت اشيل حديد علشان اعرف مرة ولو مرة واحدة اغلب اي حد فيهم
المهم ان انا بعد ما اغلب اعمل ايه
ابعت البنت الدلوعة اللي لسة مغلوبة تشتريلي حاجة ساقعة على حسابها من الكانتين
ايوة على حسابها
وزاد الطلب علي و بقت البنات بالطوابير كل واحدة بتحلم تغلبني
لكن مين
انا بقيت باحوش مصروفي علشان اشتري حاجات تانية
وزدت بتاع 5 كيلو لان كل يوم 5 زجاجات بيبسي في كل فسحة
كتير مش كدة
اهة ضريبه ان انا بنت وسط ولدين
تعليقات
إرسال تعليق