المدرسة

-
ذكريات 82

النوم عزيز علي
بالاقيه بصعوبه وباتخلى عنه بصعوبة اكتر
يعني اول ما الليل يجي تلاقيني شايله هم
اصل انا من الشطار
يعني في المدرسة شاطرة
في الرياضة شاطرة
في الموسيقي شاطرة
في الخيال شاطرة
انما في النوم خايبة خايبة خايبة
ازاي بقي
ما بعرفش
باغمض عيني و اعد الخرفان و المعيز والفيله و الدباديب
اسبح و استغفر واكبر
اقرا سورة البقرة و اسمع الشيوخ
المهم النوم ما يجيش وفي النهاية الصبح يطلع وانا حاسة ان انا لسة فاضلي بتاع عشر ساعات مكسورين عليا علشان اعرف انام
والا المدرسة
لازم اصحى بدري والبس وامشي و اروح وانا الصراحة الصبح بدري ده بالنسبة لي كانه شتيمة كلمة ما تصحش
انا بقى في المدرسة على قد ما كنت شاطرة على قد ما كنت باقوم بالعافية
احب واموت اسمع للمدرس وهو بيشرح علشان افهم و اللي افهمة ما اذاكروش
احل عليه على طول
علشان كدة اليوم اللي كنت باغيب فيه كان بالنسبة لي نكد
لازم اقرا الدرس الاول قبل ما احل الواجب
حصلت قفلة كبيرة بين الصحيان و المدرسة
ماما كانت بتتعب علشان تصحيني كل يوم
يا ستي قومي
يا ستي يرضيكي
في الاخر اصحى اخر واحدة و البس وانا بافتح عيني بالعافية
وفي يوم مامتي قررت انها مش حتوجع قلبها
ليه تقعد تصحيني ، انا حرة لو ما قمتش مفيش مدرسة
لو حد غيري كان زغرط
تاني يوم كله صحى وكله راح وانا نايمة مستنية مامتي تقولي بخ مفيش
رحت قمت كانت الساعة بتاع 11 الظهر
مشيت كدة لغاية حجرة القعاد و قلت لماما صباح الخير
هم فين اخواتي
قالت لي انت لسة فاكرة
هم في المدرسة
قلت لها وانا
قالت لي
انت خليكي لو مش عايزة مدرسة اقعدي في البيت وابقى ساعدي دولت
ودولت دي هي الشغالة
بابص لقيت دولت جنبي بتبتسم واسنانها كلها باينة من الودن للودن
جريت زي الولد بتاع هوم الون وانا باصرخ
لااااااااااااااااااا
حاصحى بدري حاصحى بدري
ومن يومها ولغاية الكلية
مفيش مرمغه على المرتبة
مفيش قفلة عين على الفاضي
لان كان عندي يومها امتحان و اللي اخذ احسن نمرة هي مش انا
يعني مستقبلي كان قرب يضيع
يالا علشان لازم انام بدري
باي

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد