النسيان نعمة من نعم الله علينا

-
ذكريات 81

النسيان نعمة من نعم الله علينا

ولكن في ايام الامتحانات النسيان نقمة

طووووووول عمري بانسى

طووووووووول عمري باركز في حاجات كتيرة و انسى الحاجات اللي مش مهمة

8 سنوات

يعني لما انزل اشتري حاجة لمامتي من الشارع ايها اهم ، ان انا افتكر اللي طلبته مني والا اشوف اهم المجلات الجديدة لسوبرمان

10 سنوات

الاهم ان افتكر اني ارجع قبل الضيوف ومعايا العصير والا اشوف البوسترز الجديدة عند بتاع المجلات

12 سنة

اروح لخالتي على طول والا العب مع القطة اللذيذة الجعانة اللي مستنية مني االلقمة

يعني اسيبها تضايق من كل البشر مثلا

18 سنة

وربنا اراد ان اعرف ليه النسيان مصيبة وده كان يوم امتحان الرسم الهندسي اللي نسيت فيه المسطرة الخاصة التي الجميلة اللي من غيرها ما اعرفش ارسم و مفيش واحد بيجيب اتنين تي في يوم الامتحان علشان يديني واحدة

كل سنوات الكلية

- على الاغلب في يوم الامتحان الصبح كان لازم لازم تلاقوا واحدة بنت سايقة عربية تويوتا في الاسكندرية على سرعة 100 كيلو ويتغرز في العربيات يمين و شمال و بتطلع على الرصيف رايح و راجع لانها نسيت الكالكيوليتور وخلوا بالكم على ايامنا ده مكانش من النوع اللي بيتباع في المكتبات ده حاجة كدة زي الاي بود بتاع الايام دي

- والا ممكن تلاقيني نسيت هو الامتحان كان 9 صباحا والا 3 بعد الظهر و اروح من الساعة 8 واستنى في الكلية في الشمس لغاية ما اللجنة تبتدي بعد 6 ساعات



كانوا اصحابي يضحكوا ويقولولي

حتفتكري انك اتجوزتي اقولهم اكيد ، الله ، امال هم بيلبسونا الدبل ليه

علشان الواحدة تروح بيتها والا كنا نسينا و رحنا على بيت اهالينا



طيب انا بقى ممكن انسى اني باسوق و ابص على الكنبة علشان اشوف الشنطة و اطلع منها الموبايل

ممكن انسى اني انا اللي باسوق وانا باتفرج على فتارين المحلات

والا انسى الاكل على النار عادي

ممكن وانا سايقة ومروحة على البيت الاقي نفسي مكملة لاخر الكورنيش وبعدين ارجع تاني الاقي نفسي جبت اخره من الناحية التانية

انسى ان انا رايحة لمامتي و الاقي نفسي قدام الكلية

كل ده مش مشكلة

المشكلة لما جبت اولاد

مش معقول ان انا اروح والاقي نفسي خفيفة واكتشف ان بنتي سايباها عند مامتي وهي عندها شهور

او اخد ابني وهو 10 سنوات النادي واقول له حاعدي عليك كمان ساعة بعد التمرين و اروح بعد ساعتين البيت عادي جدا ولما يسألني جوزي عن ابني اقول له هو لسة ما جاش واكتشف ان انا اللي حاجيبه و الاقيه جاء بعد ما اخد تاكسي

وبنتي وهي 12 سنة اخذنتها معايا دار للايتام و كنا مجموعة من الاصدقاء ولما خلصنا توزيع الحاجات ركبت العربية و سيبتها ولما اصحابي اكتشفوا ان انا نسيتها جابوهالي وانا من كسوفي قلت لهم مين قالكم ان انا عايزاها ، مش جايز اكون باسربها زي القطط



والا في رمضان لما قررت ان انا مش ممكن انسى اجيب بنتي من الدرس الخصوصي اللي كان عند واحدة من صديقاتها و رجعت البيت من غيرها كالعادة و لقيت ابني و زوجي واقفين بيساعدوا في التسخين للفطار و بمنتهي الصرامة و الحزم قلت لهم

امال فين البنت ، المفروض انها تساعد مش انتم وبصوا لبعض وقالولي

هي مش معاكي ؟؟

وكالعادة لقوني على سرعة 100 باحاول اوصل لبنتي و ارجعها البيت قبل المدفع ما يضرب

واصبح من علامات الاسكندرية المشهورة

كوهينور هانم بتجري بالعربية لان فيه حاجة ناسياها



لكن الموضوع اختلف تماما بعد سن الخمسة والخمسين

اكتشفت حاجة اجمل

ان انا دلوقتي ما بقيتش انسى





انا بانسى اني نسيت

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد