ايام الشباب

-
ذكريات 83

ايام الشباب ايام جميلة بيبتدي الواحد مننا ياخد باله من نفسه
لازم ما يبقاش طخين
لازم يحافظ على شكله
وبالطبع و نتيجة الحركة الدائمة اللي كنت باتصف بيها مكانش ممكن اطخن ولكن بعد سن 14 او 15 ما تضمنش
المهم ان انا قررت اعمل ريجيم
ايوة ريجيم
وانا عندي 15 سنة
اساسا كان طول عمري رفع البوصة و كنت تريقة اخواتي ولكن لكل حلم نهاية
بدات اطخن و رحت ادور على ريجيم
الجيل الماضي ما بيحبش يسمع الكلمة دي
الريجيم
لا انت ممقوته
انت ضعفانه
ولكن بعد اصرار و نتيجة ان فيه واحدة طنط من اياهم قالت لمامتي ان انا طخنت
ما كدبتش خبر و جبت اول ريجيم وقع تحت ايدي
على فكرة في الستينات مفيش حاجة اسمها دكتور يخسس
ولا مجلات كلها عن الاكل الصحي
بالعكس ابلة نظيرة بتقول مفيش زي السمن البلدي يا ستات
مسكت ورقة الريجيم اللي مكتوب عليها 3000 كالوري
الصبح /
اربع قطع توست و جبنة و فواكه و خضر و شاي بالحليب ومش فاكرة الباقي
قلت يا منت كريم يا رب
الريجيم جميل
بعد كدة مكتوب
الفطرونة
ايه هي الفطرونة انا الصراحة ماكنتش عارفة بس لقيت اكل قمت كلت
مكتوب في الورقة
فاكهة او عصير و زبادي و مش فاكرة الباقي
الغذاء
صحن بطاطس محمرة و نصف دجاجة
الله هو ده ريجيم ده جمييييل
ده انا ممكن اعيش عليه و افضل اخس
المهم بعد كدة
العصرونة
محدش يسأل لان انا لسة ماكنتش عارفة الفطرونة
عصير و زبادي و مفيش مانع حاجة تانية
العشاء
الصراحة ما قدرتش اكمل العشا وكنت زعلانة لان كدة ممكن اخس
الحمد لله استمريت على هذا الريجيم كذا يوم و النعمة بانت علي و بقى وشي مدور وجميل و تختخت زيادة
وبعدين ماما مسكتني
انت عمالة تاكلي كتير ليه فيه حاجة مضايقاكي
ابدا يا ماما ده ريجيم
ريجيم مين يا ستي اللي طول النهار بتاكلي فيه
وريتلها الورقة
قالت لي دي
قلت لها ايوة انا بامشي عليها بقالي مدة
قالتلي يا بنتي الريجيم ده كان لباباكي علشان وصل وزنه لاكتر من 120 كيلو
وده علشان ينزل ل100 كيلو
رحت بسرعة على الميزان
الحمد لله الحمد لله
لقيت ان انا لسة ما جيتش ال 100
ودي كانت اخر مرة اعمل ريجيم
عارفين ليه
اكيييد عارفين

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد