مفلفل والكابوريا
كان فيه ولد طعم
طعم قوي
مش لازم شعره ناعم ولا عيونه ملونة
كان دمه خفيف وكل اللي يعرفه يحبه
ومعاه اخته التوأم
هي كمان طعمة خالص زي العسل
لكن فيه واحد غلس غلس غلس غلس
كان مراقبهم ومش عاجبه طعامتهم
قال انا حاقرفهم
حاشبط فيهم ومش حاسيبهم
حاتعبهم
حاوريهم ان الطعامة مش كل حاجة
الغلس ده اسمه سرطان
كابوريا يعني
لما يمسك في حد زي الكابوريا يمسكه بكل ايديه
اصل عنده ايدين كتيرة
وبيجي من غير ميعاد
وبييجي للناس الطعمة
جاي كابوريا ولبس في رقبة الولد
وفي بطن البنت
وفضل ياكل من اكلهم
ياكل من اكلهم
ويخليهم يخسوا
ويخليهم يضعفوا
لكن هم طعمين
مبسوطين وبيضحكوا و مش عارفين ان فيه واد غلس ماسك فيهم بايديه كلها
في يوم الولد قال لمامته رقبتي بتوجعني
وفي يوم البنت قالت بطني بتوجعني
راحوا للدكتور قالهم حاسبوا
ده كابوريا جالكم ولابس فيكم
احنا لازم نجيبله الواد مفلفل الجدع
مفلفل
الولد قال انا مش باحب الفلفل
البنت قالت وانا كمان مش باحب الفلفل ده حراق
الولد قال آخر مرة اكلته لسعني في لساني
الدكتور قالهم ايوة هو بيحب يلسع ويعاكس
بس كابوريا بيخاف منه وبيهرب
ضحك الولد والبنت وقالوا هاتولنا مفلفل ده خليه يغلس على كابوريا زي ما
كابوريا مغلس علينا
مسك الولد مفلفل وباسه من راسه وشربه وقاله يالا ما مفلفل
مفلفل قال له
لوحدي ما ينفعش لازم تساعدني
اشرب وكل كويس
واعمل اللي الدكتور يقول عليه
والدكتور بيديني كل يوم تقرير في الحقنة اللي بتاخدها
وانا كمان حافضل لازق في الكابوريا لما اقرفها
دخل مفلفل ووصل لعند كابوريا
آه ه ه ه ه ه ه ه
كابوريا قعد يزعق ويقول له
امشي من هنا انا مش عايزك
ومفلفل يضحك
ولما مفلفل يضحك يزغزغ الولد يضحك
ولما مفلفل يضحك يزغزغ البنت تضحك
وكابوريا مش عايزهم طعمين
ولا مفرفشين
يوجعهم اكتر
يقوم مفلفل باخخ فيه فلفل
كابوريا يعيط ويدبدب ويتنطط
ومفلفل يضحك
والولد يضحك
والبنت تضحك
كل يوم كل يوم وكل ساعة
الولد يضحك وكابوريا يصغر ويقل ويقل ويقل
والدكتور يبعت التقرير لمفلفل في الحقنة ويقول له
الحمد لله بقى احسن كمل شغلك مع كابوريا
هاهاهاها
هاهاهاها
وكابوريا في الآخر بقى قد حبة الفلفل
راح مفلفل واخدة وبالعه وفضل يصرخ جوه مفلفل
راح مفلفل طلع من الولد وطلع من البنت
ووقف وعطس عطسه كبيراااااااااااا
راح كابوريا الصغير راح في الارض
وداس عليه الولد فطسه
وداست عليه البنت فطسته
هاهاهااهاهاها
ومن ساعتها
فضل الولد الطعم طعم وبيضحك على طول
وفضلت البنت الطعمة طعمه على طول وبتضحك
هاهاهاها
ومفلفل واقف مستني لو كابوريا دخل عند اي حد
يدخل يخليه يتنطط ويطلعه من جوه ويدوس عليه
وتوتة توتة خلصت حدوته الولد الطعم والبنت الطعمه
تعليقات
إرسال تعليق