الوطن

يعني ايه الوطن

يعني ايه كلمة وطن 
يعني ارض كانت ملك لابويا وجدي واجداده ووصلتني 
ارض ماتوا عشانها واتهانوا عشان يحافظوا عليها ووصلتني
يعني عيلة بتحبني واخوات ساكنين فيها وفي قلبي قبل منها
يعني اكلة حبيتها وريحة ورد في موسم ربيع كل حواسي فاكراها وما تنساهاش 
يعني هزارة يعني شتيمة يعني رصة صينية في فرن 

يعني قمصة من صاحبة عشان ما عزمتهاش على عيد ميلاد
يعني شلة فاكراني ولو كنت في بلد تانية 
يعني ناس تحبني وما شفتهاش وناس تساعدني وتسيبني قبل ما اعرف اسمها 
يعني تاريخ افتخر بيه 
يعني تراث في كل حارة ما يتسابش 
يعني حتى الزبالة اللي في كل زاوية توريني الكرم والتلقائية 
يعني زمارة طويلة لحد مش عارف انها تؤذي مريض 
يعني فريق كورة حاسة انه فوق العالم كله بجون يتيم دخله في شبكة في وقت ضايع 
يعني ولد في شارع ابتسمت في وشة قام اعتبر ان الدنيا فتحت ابوابها 
يعني نصاب فاكرني عبيطة وانا نيتي اديله عشان ثواب 
يعني صعيدي بريء ممكن يموت حد شهامة منه لو لقاه بيؤذيني 
يعني جاري المسيحي اللي لو حبيته حس ان كل الناس حلوين ونسي قسوة غيري لما يقولوا ما تعيدوش عليهم ويعتبر ان انا اخوه والتاني مش عارف ليه حط الحواجز 
يعني جدعنة
يعني خباثة 
يعني طشة ملوخية ساعة فطور جاية من جار 
يعني اخلاق ريف جميل لو حبك بقى البيت بيته ولو اتقلب عليك ما يشوفكش 
يعني التناقض بين جهل ونوبل للعلوم 
يعني بدو وفلاحين وصعايدة ونوبي وصياد وصنيعي وعشوائي وبلطجي ومنادي وشحات ومليونير 
يعني فيلم عربي قديم تضحك فيه مع فؤاد المهندس وفيلم جديد تنبسط فيه مع احمد حلمي 
وفيلم زفت تقرف منه وتمثيلية ازفت ترجع بعد ما تشوفها 
يعني التنوع اللي بيخليني حاسة ان اي حاجة تحصل في العالم كانت اتجربت عندنا الاول 
يعني متدين تحبه وتحس ان ربنا معاه ومدعي اسلام ممكن يسب ويشتم ودقنه واصلة لركبته 
يعني سلفي بدًّى حب الله على شكله 
يعني منقبه غطيت وشها اللي ربنا كرمه اكراما لله 
يعني واحدة عايقة بتقول الدين في القلب وتخاف من ربنا اكتر من ناس مقضيينها سنين بيسبحوا 
يعني دموع من واحدة سمعت عن يتيم 
يعني اكبر مستشفى تتبني بفلوس الزكاة 
يعني شعب ينام ثلاثين سنة ويصحى من النوم مهيبر في الشوارع والطرق 
يعني كل واحد نفسه انها تبقى بتاعته هو وبس 
هي دي مصر 
هو ده الوطن