جدو حول العالم

-


ذكرياتي 73
الاسماء تدل على الشخصيات و على الاسر فالاسرة اللي اسمها مجعلص تبقى اسرة مشهورة و اللي اسمها عادي محدش بيحس بيها وعلى ايام زمان موضوع الاسر ده كان مهم جدا
ابن مين و مين خاله
ويقعد والدي ويحكي عن الاسرة و ازاي العمودية في الاسرة من القرن الكام و ان جده هو اللي اسس القرية كلها و مامتي تحكي عن الشارع اللي اسمه على اسم جدي و املاكه في الشارع
وانا اسمع و انبسط ولكن دي مش حكاياتي مع اولادي دلوقتي لان الدنيا اتغيرت و المدارس مليانه ناس من اسر ما تعرفيهاش و جدهم مش قائد طابية على راي شويكار
انا بقى طول عمري ما كنتش باتكلم عن عائلتي مع اصحابي بدون داعي و لكن في مرة لقيت واحد صاحب اخويا الصغير بيقول لي يا بختك !.... جدك كان رحال
انا سمعت من مامتي ان جدي كان عنده مراكب و كان اتجوز واحدة من تركيا و احنا من سلالة تلك السيدة الجليلة و لكن حكاية جدي الرحال دي جديدة
قلت له :
كان بيسافر كتير فعلا لان كلمة رحال كانت تنفع مع قصص السندباد اللي ما سمعتوش عنها حاجة و اللي لازم تتعمل كارتون لحسن في الاخر الصهاينة حيقول للاجيال الجاية انه يهودي و هو اللي اخترع البوصلة وكلام من اللي سينما هوليود بتسوق له
بس صاحب اخويا كان معجب جدا بجدي لسبب مجهول انا كان نفسي اعرفه
واخويا الصغير بطبيعته كتوم بالتالي كلمة ورد غطاها و انا مش عارفة اطلع منه سبب اعجاب صاحبه بجدي
المهم في يوم دخلت الاوضة وانا جايبة العصير لاخوبا وصاحبه ولقياهم واقفين قدام بوستر (صورة كبيرة ) متعلقة على الحيطة و عليها فرقة الاسموندس osmonds
ودي فرقة مشهورة على ايامنا في الستينات و كانت عاملة ضجة في امريكا و لقيت اخويا بيكلمه على الفرقة دي و الشبه اللي بيننا وبينهم واكتشفت سبب حب صاحبه لجدي
اخويا فهم صاحبي ان جدي
osman
المهم انه فهمه انه كان بيسافر العالم كله وانه بيتجوز من كل بلد واحدة و ان الامريكانية هي اللي جابت الفرقة دي وهم علشان كدة قرايبنا وعلشان كدة شبهنا و الولد مقتنع جدا
خصوصا ان اسم كوهينور ده اسم مش عادي وغالبا اقنعه ان انا من الست الالمانية لان كان فيه اقلام الماني اسمها كوهينور في السوق ودي كانت بداية قصص جدي الرحال اللي كنت باحكيها خلال حياتي لاي حد يسالني عن اسمي وسبب تسميته
خصوصا ان عثمان باشا من مؤسسي الدولة العثمانية فالعملية ممكن توسع معايا جامد و اطلع قريبة محمد على بقى و يطلع المماليك اتقتلوا على يدي و كلام من ده

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد