يا ليلة العيد

ذكريات 84

انا في ليالي العيد اتذكر طفولتي وكيف كانت

كان لازم البيجامات و الغيارات واللبس بتاع الثلاث او الاربع ايام والشرابات و الجزم و كله كله كله كله جديد في جديد

و افتكر لما كنت ارصهم وكاني لابساهم على السرير وانام على الحرف جنب لبس العيد وانا فرحانه لان بكرة العيد والنهاردة الوقفة

مكانش على ايام طفولتي السعيدة فيه ناكي ولا اديداس 

مكانش فيه اسماء وماركات

مكانش الولد ولا البنت يبصوا لاهلهم شذرا جزرا لان التي شيرت مش سينييه

للاسف احنا بتربيتنا لاولادنا ضيعنا شوية بهدة العيد الجميلة

انا فاكرة العيدية وهي 5 صاغ او 5 قروش لما نروح بيها لعم نافع ونشتري السينالكو علشان ب 3 تعريفة يعني قرش و نص بدل السيدر اللي ب3 صاغ او 3 قروش علشان نقدر نجيب بالباقي نعناع و شكولاته

فاكرة اللعب و الصواريخ لما كنا نطلع في السطوح عند خالتي و نولعها و نهيص

فاكرة السهرات اللي لتاني يوم من كتر الفرحة ان بكرة عيد

المهم المذكرات المرة دي على الصواريخ دي لان انا كان عندي اخ يحب التجربة و الخطأ و حكاية التجربة و الخطــأ عنده والحمد لله لم ينتج عنها اعاقة كاملة ولا تأهيل مهني ولا اي قتلى

آخر التجارب كانت في ليلة العيد لما جاب الصاروخ وقرر يطفيه في قفا ابن خالتي

مش عارفة ليه الدنيا قامت ومامتي قعدت تقول له كنت حتشله

انا ما كنتش فاهمة ايه دخل الشلل في القفا

بعد سنوات و سنوات عرفت ان المخ اساس كل حاجة وان مركز الاعصاب بتعدي من القفا و علشان كدة لما كان اخويا ي..... على .... كانت ماما تقول له

حاسب لحسن تعميها

وانا برضة ما كنتش عارفة ايه دخل قفايا في عيوني

المهم من النتائج المهمة جدا للتجارب الهامة لاخويا العزيز

ماكينة الخياطة ممكن تخيط الصوابع بس ..... الصوبع بيتعور جااامد و بينزل دم

شكرا

عرفت