طفلة للابد

الفجلة اللي فو الصورة مزروعة في عجلة من عجل العربيات محطوط لها سماد من مخلفات الحمام وصل وزنها اكتر من كيلو تخيلوا لو زرعنا في العجل بدل ما رميناه بس بنحط جواه كيس يمنع تسرب المعادن من العجلة للتربة الضحكة اللي شايفينها من فرحتي بالنتيجة الجميلة للزراعة السطحية

عبقرية علي اللي كتبها العقاد تحسسك ان الدنيا كلها كلها كلها كانت ضد علي بن ابي طالب وان محدش فاهمه لانه كان تفكيره وعلمه اكبر بكتير من كل اللي حواليه وهو اطيب من انه يبقى خليفة حقيقي علي بن ابي طالب كان انسان متميز بمعنى الكلمة ولكن قال كلمة ما معناها ان هناك من سيدخلون النار من كتر حبهم له واناس سيدخلون النار من كتر كرههم له الله يرحمه ويرضى عنه ويجمعنا به في الجنة يارب الشخصيات دي لازم يكون فيه مادة لتدريس الشخصية وجوانبها النفسية علشان الناس تتعلم

الجميل في البوست مش الانجازات اللي تمت على الارض الجميل ان اصحاب مع بعض عملوها وهم فرحانين مجموعة قرروا يدخلوا الجنة سوا ويجتمعوا على الله ويحبوا بعض فيه مجموعة ان شاء الله تلاقوها تحت ظله يوم لا ظل الا ظله من رمضان اللي فات لغاية النهاردة عارفين عملوا ايه في منطقة ابو النوم اللي بتتنمى تنمية مستدامة اليومين دول وهم مش ساكتين بينحتوا علشان يطلعوهم على وش الدنيا - صبوا مسلج ل 12 سقف لاتناشر اسرة كانت بتنام تحت القش والمطر والساقعة والبرد يخش في عظامهم عادي ولا مائة بطانية حتدفيهم - وزعوا اكل للاسر والمناطق اللي اتصاب فيها ناس بالكورونا وبقية القرى اعتزلتهم - دفعوا ديون للصيدلية لان المناطق دي محدش معاه يجيب الدواء لان رزقهم بيكون موسمي - دخلوا تسعة عدادات مياه لناس كانت بتضطر تجيب المياه اما من الترع او تستنى المسجد لما يفتح تاخد منه - جوزوا اربعة بنات بس بجوازات معقولة مش الهبل بتاع اليومين دول - جابوا احذية ل 22 طفل لما لقوا ان القرية دي اولادها معظمهم حافي - وزعوا اكثر من الف كيلو لحمة على الاسر الفقيرة والمسكينة واللي عائلها مريض - عملوا وحدتين هيدروبونيك زيادة علشان ناتج الوحدة يط...

طبعا موسم الصدقات وصرف الزكاة يعتبر خلص لان معظم المصريين يحبوا يطلعوا فلوس المساعدات والزكاة في الايام المباركة زي رمضان واول عشرة في ذي الحجة انا بقى دايما اروح على الوقت الميت ليه لان هو ده الوقت اللي الدنيا بتنشف فيه زي كدة لما تروح جامع او مسجد مهجور بتروحه ليه علشان تحييه وربنا بيحب الناس اللي تساعد على الحياة انا مش بتاعة موضات يعني ما اروحش على الرايج اروح على المنسي حتى لما كنت باروح الملاجيء اسيب العيال اللي قدامي وادور على البعيد اللي قاعد مع نفسه ما توقفوش الخير طول السنة لعل الايام التانية يبقى الثواب فيها على قد الانقاذ ربنا يديم عليكم الخير ويثبتكم دايما ويتقبل خير اعمالكم

عايزة اقولكم على حاجة الفيروس القوي عايز اللي اقوى منه واللي اقوى منه هو جهاز مناعة الانسان وبالتالي الفيتامينات اللي بتتاخد علشان جهاز المناعة يقوى مهمة لكن الاهم منه ان الانسان نفسه يشعر بقوته وبقدرته على التغلب على المرض من غير ما تقوي نفسك وتشعر بقوتك عمرك ما حتتغلب على المرض كنت سمعت حكاية عن اسد اسمه لامبرت مامته ماتت وهي بتولده ولقى نفسه بين الخرفان وافتكر نفسه خروف وافتكر ان واحدة من النعاج والدته كان بيعتبر نفسه خروف ضعيف لان ما عندوش قرون ينطح بيها ولما كانت الخرفان تنطحه كان بيقع ويضحكوا عليه في يوم جاء ذئب يهاجم القطيع لما شاف مامته حتتاكل راح للذئب وطلع الاسد اللي جواه ومات الذئب وعاش الاسد بين الخرفان اسد مرة تانية انت اسد وجواك اسد ساعة ما تحس ان الكورونا جاءت لبابك قول لها انا اسااااااد بس تشرب مياه كتيرة لان جهاز المناعة بيطلع بروتينات كتيرة يهاجم بيها الفيروس وبالتالي الدم بيبقى لزج اكتر من العادي ولازم يكون فيه سوائل تنزل البروتينات اللي ما استخدمتش ويفضل لزوجته مقبوله والا ممكن يحصل تجلطات وانا اساااد # انا_شجيع_السيما_ابو_شنب_بريمة

لما الناس المحترمة تجتمع الدنيا تنور Eman Sorour رئيسة مجلس امناء مؤسسة اصدقاء فرانكو بازاليا اللي معايا في كل عمل الخير من ايام ما كنا في جمعية رعاية الاطفال في محرم بك وكانت بتسند وتساعد في كل وقت ودخلت معايا في جواهر الحياة ايام ما عملتها وفي النهاية نتيجة ان كان فيه منح من الخارج فكان لازم تكون فيه مؤسسة تسمح بذلك وعملت المؤسسة بتاعتها وكل واحد كان عينه على التاني وعايز يساعده بأي حاجة اولادنا من نجع عون راحوا في المشروع بتاعها اللي كان اسمه ريميدي اللي اتعمل بالتعاون م ع جمعية تانية وكانوا ممتازين وبيعملوا شغل حلو قوي واستمروا معاها احنا دلوقتي ان شاء الله سوا برضه وحنعمل شغل حلو وبوجود ايمان شخصيا و  Sherina Luna  معاها في نجع عون اتوقع الجمال كله يتواجد لان الناس الجميلة دايما بتعمل حاجات جميلة نورتي نجع عون يا ايمان وان شاء الله زي ما بتوري في كل حتة اتوقع النور حيزيد في النجع

ربنا كان مخلي الشيطان في الجنة زي الملائكة من كتر عبادته لله اترقى وبقى في صف الملائكة ولكن لما لقى انه حيسجد لحد بص كدة واستكبر نفسه على المهمة دي وبالتالي تسبب في ان ربنا غضب عليه وقعد يقارن نفسه ويقول انا خير منه وانا احسن وانا اجمل وانا اقوى المهم انه اعتبر انه احسن من الانسان ربنا غضب عليه مش علشان ما سمعش الكلام لكن علشان تكبر وطرده من الجنة وساعتها توعد وقالك والله لاوريكم كلكم شوف ربنا قاله ايه لما طلعه من الجنة اعوذ بالله من الشيطان الرجيم بسم الله الرحمن الرحيم قَالَ فَاهْبِطْ مِنْهَا فَمَا يَكُونُ لَكَ أَن تَتَكَبَّرَ فِيهَا فَاخْرُجْ إِنَّكَ مِنَ الصَّاغِرِينَ صدق الله العظيم يعني الجنة ما ينفعش يقعد فيها واحد متكبر مغرور شايف نفسه حاسس انه احسن من البشر خلي بالكم

  حاكلمكم على تقوى الله ولله المثل الاعلى انت بتحب مامتك وبتحترمها وتقدرها قالتلك انا مسافرة حافظ على البيت المحافظة على البيت تعني ما توسخوش وتنظفه ما تكسرش حاجة وصلح اللي يتكسر ما تسيبش حد يسرقه وغيرها من الحاجات اللي بتحافظ بيه على بيتك وقالتلك حاسيبك شهر ممكن انت تعمل حسابك ان الشهر كتير قوي تقوم تعمل ما بدالك وتعزم اصحابك وتسيب الدنيا هايصة على اساس اخر اسبوع حترجع البيت احسن مما كان وتلاقي الاسبوع الاخير عندك انفلونزا وبرد ومش قادر تقوم من السرير وكمان مامتك جاءت اسبوع بدري ايه الاخبار كدة حتعتبرك مش بتحبها ومش بتحترمها ولا بتقدرها لو انت فعلا بتحبها قوي وبتخاف عليها قوي وبتخاف على بيتها قوي حتحافظ عليه كل يوم ومش حتعمل اللي يبوظ دايما وتعمل حسابك انها ممكن تيجي اي يوم هو احنا كدة جسمنا معانا لغاية لما نموت والدنيا بين ايدينا لغاية ما يتوفانا الله وفاكرين ان لسة فيه وقت وبنلعب ونتصرف على اساس ان لما نكبر حنعقل ونرجع لربنا ونتوب ونستغفر وممكن الوقت يسرقنا وممكن صحتنا تخدعنا لو انت بتتقي الله حتحافظ على حياتك وجسمك طول عمرك ولو انت من المحسنين حتعتبر ان ربنا معاك كل يوم كل لحظة...

وحشني اولادي واحفادي وحشتني الدنيا وحشني الجو اللي ماليان تراب وحشني الوشوش الحرانة والعرقانة وحشني المنادي اللي بيمسح قزاز عربيتي بخرقة وحشني الولد اللي بيعدي الشارع بسرعة وحشني الوشوش الشقيانة وحشني اولادي وحشني احفادي لما يناموا في حضني وحشني لمة العائلة واحنا بناكل مع بعض وحشني التعب اللي كنت باتعبه وانا فرحانة وحشني ابتسامة الاولاد في النجع لما يشوفوني والصدق طالع من عينيهم وحشني الحضن اللي كنت باخده واعطيه لكل اصحابي واحبابي وحشني جيراني وقرايبي واخواتي وحشني النرفزة على البياع اللي مصمم يفهمني انه مرخص الحاجة وهو واخد الضعف وحشني صوت الترام وهو بيعدي على الفلنكات وحشني السفر والقطر والمحطات وحشني المواجهة والمناقشة والجدل ايه اللي الكورونا عاملاه ده خلتني صورة في التليفون خلت صوتي يطلع من سماعة صحيح كل نشاطي مستمر والله اعلم ان لولا الناس اللي مفحوتة بتعمل للناس التانية كل حاجة كانت الدنيا وقفت ولكن ربنا بعت ناس مخلصة جادة امينة شايلة عبء التنمية وانا مرتاحة في التكييف باكتب واتفلسف وحشني ...

ربنا سبحانه وتعالى بيقول ادع الى سبيل ربك يعني ادع الناس للسبيل للطريق للناحية اللي ممكن توديك عند ربنا السبيل ده كل واحد بيمشي فيه بطريقته اللي بيجري واللي بيمشي واللي بيحبي واللي على الشمال وبيبص على الفتارين واللي على اليمين ومركز محدش يفرض على التاني الوسيلة اللي بيستخدمها في السبيل انت لك سرعة وغيرك له سرعة تانية لما تقول للي على كرسي بعجل اجري حيقع على وشه ولما تقول للي بيجري اقف حيقع على وشه كل واحد له وسائله واسبابه وربنا بيعطي كل منه سببا فاتبع سببا اتبع اللي ربنا ميسره لك في السعي في سبيل الله وانصح الناس بالحكمة مش بالقهر ولا بالخوف بتاع لو ما عملتش زيي حتخش النار ولا بالابتزاز العاطفي بتاع لو عملت كدة ولادك حيروحوا في داهية خليها بالحكمة اعطي العطشان بالمعلقة وعلمه يشرب بالراحه وسيبه بلاش تكب المياه في فم العطشان لما تعمل له صدمة يروح فيها والا يشرق ويموت الحكمة والموعظة الحسنة

عايزة اقولكم كلمة سر لما بتكبروا في السن بيبقى شكلكم اطيب مش اوحش لأ اطيب إلا اللي يقرر انه يلعب في وشه ويشده يخليه زي ما يكون مخضوض او يحط فيه حاجات يخليه زي ما يكون متضايق وحد مزعله ونافخ خدوده سيبوا جمالكم الطبيعي لما يتحول الى طيبة ويبان عليه فرح السنين وحزن السنين دي كلمة سر محدش يطلعها برة الكوكب

لما ربنا يقف جنب ناس يسخر لهم ناس فيه ناس في قرية علوة سعيد و قرية الصفيح والقرى جنبها كانوا في حالة من الفقر ومحدش حاسس بيهم ولما انتشرت الكورونا فيه كمان قرى كاملة الناس بطلت تطلب منهم عمال ولكن ربنا بيفتح ابواب محدش يصدق انها تفتح وعلى يد ناس محدش منهم كان مصدق انه حيفرق في الدنيا وانا النهاردة باكتب بوست علشان افرح الناس اللي عملت واعطي امل للناس اللي حاسة ان الدنيا مش بخير وان الناس وحشة وان الفقير ده استغلالي وان الغني ده بخيل وغيرها من الاحوال اللي الشيطان يحب يعممه ا علشان الناس تيأس في خلال حوالي ستة اسابيع بدأت من قبل رمضان الى ما بعد رمضان بحبة تم الانتهاء من حاجات كتيرة في المنطقة دي اتوزع حوالي 500 شنطة للتغذية اتوزع فراخ بلدي للتربية والبيض ل 116 اسرة تم سداد ديون 18 شخص كانت ديونهم حتدخلهم السجن وفيها كتير ديون اشترى بيها الشخص قيراط ارض يعيش فيها فيه 29 اسرة دخل لها مياه اتزرع شجر توت اكثر من 3500 شجرة تم توزيع وجبات مطبوخة لأكثر من 1500 اسرة تم توزيع فوق 100 فرخة و اكتر من 150 كيلو لحم تم سداد ديون الصيدلية اللي جنبهم باكثر من 1800 جنيه تم عمل مشاريع بط ل 4 اسر تم...

انا خايفة من حاجة واحدة الناس فاكرة ان التنمية هي شوية مشاريع تتعمل للناس الحقيقة ان التنمية اعمق من كدة الانسان هو اللي لازم تركز عليه لان لو عطيت له المشاريع من غير ما يكون مؤهل لها في العادة حتفشل التأني في التنمية ودراسة التغيير في التنمية البشرية هو ما يساعد المجتمع على النمو وانت داخل تعمل تنمية لمكان بص على الاطفال والشباب هم دول اللي حيشيلوا اللي فوق 30 ربنا يعافيه مالناش دعوة بيه ده بدأ و اتربى بأسس مختلفة فيهم الممتاز وفيهم اللي لسة لازم يتغير من اهم دعائم التنمية في نجع عون ان البشر هناك على الفطرة واخلاقهم هادية وجميلة وان الشيخ رجب كان نعم الراعي والمتابع وكان متفرغ تماما لله ورسوله نجع عون فريد في تكوينه ولكن تنمية النجوع والقرى الاخرى حتحتاج شوية شغل مختلف قد يكون اكتر شوية على مستوى البشر قد يكون اكثر على مستوى المشاريع لكن ما ينفعش نسخ وتكرار بدون دراسة

Enas Mostafa  ده مشروع عملته ايناس حبيبتي في برج العرب لواحد كان بيشتغل جارسون و حاله واقف فقال لها انا ممكن اعمل عطور و ابيعها و بالفعل بدأ المشروع اهوه بالتوفيق يارب # برج_العرب_حتنور

مادة التاريخ زمان كان بتركز على بلد تم فيها ايه ومين حكمها وعمل ايه وازاي حارب وحارب مين حاليا مادة التاريخ لازم تاخد الكرة الارضية زي ما هي وتقول للعيال ان الفراشة اللي اتحركت في سان فرانسيسكو تسببت في اعصار في تايوان التاريخ دلوقتي ما بقاش بلاد التاريخ حاليا وبعد ما اصبحنا حاجة واحدة لازم يتكتب ومعاه مؤثراته يمين وشمال ومادة التاريخ لازم تتعمل زي مادة الرياضيات يتقال لهم يعني ايه سياسة يعني ايه مواءمات يعني ايه اللي عدوي في ثانية يبقى صاحبي يعني ايه اخليك تضرب صاحبي واطلعك بتتنمر عليه يعني ايه اعطيك نصيحة تلبسك في حرب وانا ابيعلك السلاح يا ختااااااي

لا تنشغل بنفسك فيتركك الله لنفسك

كم هو ثمين الوقت الذي نقضيه في الأرض وكم نضيع منه الساعات والأيام واحيانا شهورا تمضي ونحن منغمسون في احزان وافراح وحقود وقلق وتوتر كم هو ثمين هذا الوقت الذي يتسرب من بين ايدينا ونحن احق به من ان نسلمه لشيطاننا يعمل به ما يشاء ارى حولي من رفض أن يسعد نفسه وأصر على أن يعيش في ذكرى لا تعيد له ما فات ان الشمس التي تشرق كل يوم هي علامة يوم جديد ولن تجدها أبدا تشرق كما هي بل هي تشرق في يوم آخر ، يوم يجب أن نكون قد علمنا فيه شيء أو تعلمنا شيء أو أعطينا شيء أو حللنا شيء أو أكلنا ش يء أو ظلمنا أو حلمنا أو وقفنا أمام ظلم أو ساعدنا على الظلم أو عبدنا ربنا خير عبادة أو أهملنا في عبادته كل شمس هي مختلفة عمن سبقها فلا تتعامل مع حياتك وكأنها تكرار في عادات من الأعمال تعملها وكأنك آلة ابدأ يومك صباحا مستعدا لكل التحديات ومصرا على التغلب عليها اترك السابق واجن القادم فلا تشعرن أنك لا تمتلك شيء فيكفي خبرتك التي تعطيها لغيرك لا تجعل القبر يدفنك ويدفن اعمالك بل اجعله الوقت الذي ستستريح فيه لكي تكمل اعمالك نفسها وتستمر تجني منها وأنت فيه صباح الخير في عيد الأضحى الجميل وأسعدكم الله

ياريت في وقفة عرفات اللي افتكر الراجل بتاع الخفاش يدعيله دعوة حلوة كدة ان ربنا يسد نفسه لحسن دوخ العالم كله حسبي الله ونعم الوكيل فيك يا صيني يا مقرف قلبي وربي غضبانين عليك يا طفس الخفاش مسامحاه مكانش يعرف انما انت حسبي الله ونعم الوكيل