طفلة للابد

فيه ناس متضايقه انه لم يذكر اسمي مرفقا بنجع العون اللي اصبح مثار للفخر والكلام عنه في وسائل الاعلام موجودة واحب اطمئن اصدقائي ان ده بناء على رغبتي كفاية قوي علي اني باقول لكم وباكتب على الفيسبوك وده لان نيتي فيها ان فيه ناس بتساعد وبتعطي ولازم تعرف بيحصل ايه ولان نيتي التانية ان فيه ناس مكتئبة ومحبطة ولازم تفرح بانها بتشوف تطور للاحسن ولان نيتي التالتة ان فيه ناس عايزة تعمل تنمية ولازم تتعلم من ا للي بتقرا عنه وتشوفه لكن مش لدرجة ان اسمي يكتب في جرنال لان ما فيش فيها نية اقدر احطها واقول انها تنفع فيها انا سعيدة بان يتم معرفة تجربة التنمية في نجع العون واتمنى من الله انها تتكرر في كل مصر وبالاخص في الاماكن النائية او المهملة زي صعيد مصر انا تحت امر اي حد عايز يعرف الخطوات وازاي يكررها وان شاء الله فيه حبايبي وقرايبي في الغردقة بيعملوا تنمية مشابهه في الصعيد وحاقعد معاهم علشان اوصل لهم كل خطوات التنمية وازاي ان الاحتياجات بتؤثر على الخطة وان علينا اننا نحط العامل البشري جزء مهم في التنمية وان كرامتهم قبل اكلهم وشربهم حبايبي عاملين حاجات مشابهة في الغردقة بس فاضل شوية خب...

في سورة الانبياء اول خمستاشر ايه عن الناس الضالة او المضلة اللي مش عايزين يرجعوا لربنا او اللي مش عايزين يهتدوا لله ثاني خمستاشر ايه عن التوحيد وان الكون مافيهوش الا اله واحد ولو كان اكتر من اله لفسدت السماوات والارض بعد كدة بيتكلم عن الايات بتاعته حوالينا ان شاء الله حابدأ في الكتابة عن الايات من 31 في الايام الجاية

اذا خشع قلبك لله. ستعلم ان الحمد لله لا حمد لشخص اذا خشع قلبك لله ستعلم انه مالك يوم فلا تظلم اذا خشع قلبك لله سيتطور ايمانك وستعلم ان ما يمر عليك اختبارا وحبا وليس عقابا فهو الرحمن الرحيم الم يأن للذين امنوا ان تخشع قلوبهم لذكر الله

والدي اللي يرحمه كان مستشار قانوني ومحامي بالنقض من بتوع زمان كان يقول لي انا باقوم من على مكتبي للفراش لكن الوزير لا عارفة ليه علشان فيها شبهة نفاق كان يقول لي ما تخافيش الا من ربنا وكنت اقول له واخاف ليه انا باحبه يقول لي خوفا وطمعا الدين ما بين الاتنين وكان له كلام كبير كتير وكان صاحبي نقعد نتكلم مع بعض بالساعات صحيح كنت متعبة حبتين في التربية لاني ما كنتش اقتنع بسهولة وما اعملش حاجة مش مقتنعة بيها وده كان بياخد منه وقت طويل للاقناع ولكننا كنا اصحاب بالذات في الثانوي مع انه مكانش فاضيلي بس عمره ما قطع معايا الكلام وقال لي كفاية كدة او انا مش فاضي اتعلمت منه اني احترم الصغير قبل الكبير اتعلمت من تربيته لي اني اصبر على اللي قدامي واسمع له مهما كان سنة ومهما كانت مشاغلي طبقت اللي اتعلمته مع اهل النجع حاليا في النجع علمتهم احترام الصغير قبل الكبير كنت في الاول بالاقي الشاب لما تطلب منه حاجة يقيم اذا كان يوافق والا لا علشان ساعات بيعتبر بعض المهام تهزيء من وجه نظره كنت اللي اخاف انهم يفهموه غلط بعد ما اطلبه اقول له مش مشكلة حاعمله انا وبعد ما عرف كل واحد منهم قيمته ...

الكراسي بتاعة البنات والترابيزات حيعملوها في النجع بنفسهم ممكن ما تكونش حتبقى احلى كراسي بس اكيد حتكون اريح واسعد كراسي يقعدوا عليها ياسلام يا سلام يالا بينا القطر اتحرك من المحطة وماشي بيصفر اهوه عايزين نشوف الناس دي بعد عشرين سنة يعني بعد ما الاطفال دول يكونوا اصحاب قرار في مجتمعهم حيحصل ايه

فلنتفق على هدف يجمعنا لا راي يفرقنا نتفق على وطن على حلم على بناء نحتمي في حماه نتفق على بناء وطن لاولادنا على شخصية احفادنا نساعد الجاهل على العلم نساعد الصحيح ان يظل على حاله نساعد الغاضب على الهدوء نبحث عن سبل التقبل والتقابل والقبول هذا هو ما يجمعنا

اعرف ناس معرفة وثيقة لما يحطوا دماغهم على المخدة يناموا اه والله زمبؤلك كدة مالناش دعوة بيهم الله اكبر من عيني مش عارفة طب ده من ايه ربنا يديمها عليهم نعمة بس انا لو بانام بدري كان زمان الزمان ما بقاش زي زمان وكانت البوستات نقصت النصف ومكنتوش حتهيصوا معايا

البنات النهاردة كانوا بيتعلموا الشغل اليدوي embroidery وكان الغرزة بتاعة وردة القرنفل يعني ان شاء الله الملايات بتاعتهم حيعملوا عليها رود قرنفل بارز كمان ان شاء الله لما يتقنوها نعملها على الملايات ونخليهم ينزلوها في المعرض الفيلم اللي كانوا بيتفرجوا عليه كان روسي وهاجر اللي على شمالي كل شوية تقول لها بالراحة يا حاجة ما تستعجليش رسمتلهم قرنفل بالهبل النهاردة علشان يعملوه يارب يطلع حلو علشان ينبسطوا # بالراحة_يا_حاجة # احنا_اللي_حججنا_الروس

زمان رحت المصيف وكان فيه من العائلة اكثر من ستة اطفال باعمار متفاونة كنت اقعد احكيلهم حكايات واعمل لهم مسابقات وعلى بالليل يكونوا تعبوا وانا كمان فيصت في يوم كان صوتهم عالي وخناقات وحاجات قررت اني اعمل لعبة تخليهم ما يتكلموش قلتلهم انتم رجال من الفضاء وسيدات من الفضاء المفروض مش بتعرفوا تتكلموا شاورا بس الساعة اللي بعديها كل واحد عايز يقول حاجة ييجي يمسكني من وشي علشان اشوفه وهو بيمثل اللي هو عايزه ويا داهية دقي لو ما عرفتش وفي الاخر اقول له قول لي في ودني علشان اساعدك وفي الاخر قلتلهم انتم اخذتوا الجنسية الارضية واتكلموا زي مانتم عايزين وارحموا دقني ودي كانت نهاية البانتوميم في عائلتنا # صوت_او_صمت_مفيش_فايدة # ولا_الفضاء_كله_حينفع

اجمل تعليق سمعته النهاردة من عبد اللطيف الفنان الكبير اللي عمل الارضيات هو واسماعيل وكانوا واقفين بيفرجوني وانا الصراحة ما رضيتش اعلق على سلبيات في العمل بس عرفتهم ان فيه بعض العيوب اللي لازم نتخطاها ولكن قال لي احنا كنا اكتر من 12 بيعملوا في الرسمة الواحدة والله يا باشمهندسة كنا فرحانين كاننا بنلعب في ماتش كورة الله الشغل اللي كان طول النهار لغاية بالليل كانوا فرحانين بيه كانهم بيلعبوا في ماتش الصراحة بعد ما الادوات تيجي والمكان يكمل ان شاء الله حيبقوا احلى معلمين لانهم بيستمتعوا بشغلهم وهم بيعملوه وبيفرحوا بنتائجه مبروك عليهم الشغل الجميل وعقبال الدور التاني هاها يالا ما انا داخلة على طمع

رحت النهاردة المركز اللي الاولاد كانوا بيعملوا في الارضيات ولقيت مجموعة الاولاد كلها مستنياني وقال ايه عاملين شريط ومقص وحركات وعيونهم بتنط من الفرح مستنيين نظرة فرح وكلمة إعجاب ومش عارفين أنهم أجمل كلمة واحلى فرحة ممكن تحصل لي في حياتي النهاردة الأهرام أتكلم عن تجربتهم وانا اتفقت معاهم على عدم ذكري ولا ذكر أصدقائي اللي بنوا معايا الهرم الصغير ده وكله بزكاتهم وصدقاتهم وقبلها قلبهم الحنين الداعم المركز لسة ما خلص ولسة ان شاء الله حيكمل بكرة يجيبوا ان شاء الله كمبيوتر و داتا شو و سبورة علشان نكمل مشوار التعليم ان شاء الله اهل النجع والقرى المحيطة حيكونوا مثل اعلى للمصريين

محدش من العظماء كان صغير وبيحلم امتى ابقى عظيم هو كان بيحلم امتى يعمل حاجة للبشرية لما اتحقق حلمه بقى عظيم اللي اخترع او اكتشف حاجة كان دافن نفسه في معمل وبقى عظيم واحد زي غاندي اتضرب واتهان وبقى عظيم اللي مات في معركة حارب فيها ببسالة لتحقيق العدل والحق بيفضل عظيم كل ما يفتكروا بطولاته عظمة محمد صلاح مش انه بيلعب كورة حلو لا عظمته انه عنده اخلاق ما اتغيرتش بالشهرة وان تصرفاته كلها تتماشى مع العطاء المخلص وحب وطنه علموا اولادكم يكونوا عظماء بالعطاء والعمل اللي يفيد الناس والبشرية

سورة الانبياء اعوذ بالله من الشيطان الرجيم بسم الله الرحمن الرحيم اقْتَرَبَ لِلنَّاسِ حِسَابُهُمْ وَهُمْ فِي غَفْلَةٍ مُّعْرِضُونَ (1) مَا يَأْتِيهِم مِّن ذِكْرٍ مِّن رَّبِّهِم مُّحْدَثٍ إِلَّا اسْتَمَعُوهُ وَهُمْ يَلْعَبُونَ (2) لَاهِيَةً قُلُوبُهُمْ ۗ وَأَسَرُّوا النَّجْوَى الَّذِينَ ظَلَمُوا هَلْ هَٰذَا إِلَّا بَشَرٌ مِّثْلُكُمْ ۖ أَفَتَأْتُونَ السِّحْرَ وَأَنتُمْ تُبْصِرُونَ (3) قَالَ رَبِّي يَعْلَمُ الْقَوْلَ فِي السَّمَاءِ وَالْأَرْضِ ۖ وَهُوَ السَّمِيعُ الْعَلِيمُ (4) بَلْ قَالُوا أَضْغَاثُ أَحْلَامٍ بَلِ افْتَرَاهُ بَلْ هُوَ شَاعِرٌ فَلْيَأْتِنَا بِآيَةٍ كَمَا أُرْسِلَ الْأَوَّلُونَ (5) مَا آمَنَتْ قَبْلَهُم مِّن قَرْيَةٍ أَهْلَكْنَاهَا ۖ أَفَهُمْ يُؤْمِنُونَ (6) وَمَا أَرْسَلْنَا قَبْلَكَ إِلَّا رِجَالًا نُّوحِي إِلَيْهِمْ ۖ فَاسْأَلُوا أَهْلَ الذِّكْرِ إِن كُنتُمْ لَا تَعْلَمُونَ (7) وَمَا جَعَلْنَاهُمْ جَسَدًا لَّا يَأْكُلُونَ الطَّعَامَ وَمَا كَانُوا خَالِدِينَ (8) ثُمَّ صَدَقْنَاهُمُ الْوَعْدَ فَأَنجَيْنَاهُمْ وَمَن نَّشَاءُ وَأَهْلَكْنَا الْمُسْرِفِينَ ...

سورة الانبياء اعوذ بالله من الشيطان الرجيم بسم الله الرحمن الرحيم وَكَمْ قَصَمْنَا مِن قَرْيَةٍ كَانَتْ ظَالِمَةً وَأَنشَأْنَا بَعْدَهَا قَوْمًا آخَرِينَ . والقصم: أصله الكسر، يقال منه: قصمت ظهر فلان إذا كسرته، وانقصمت سنه: إذا انكسرت ، وهو هاهنا معني به أهلكنا

بقالي مدة اصحابي بيقولولي خسيتي قمت خفت لحسن ما يعرفونيش من الخسسان رحت اتعشيت 2 باكو شكولاتة بعد ما خلصت طبق الحلويات في حفلة مؤسسة فرانكو بازاليا ومن ساعة اخذت العشا العادي بتاعي اللي مكون من كل ما تحبه الارانب # ماتخافوش_حاطخن_تاني # الخسسان_بيجي_لوحده_مش_قصدي_والله # تعيش_الشكولاتة_ت_تعيش_ت_تعيش

حفيدي قعد معايا كام يوم بيقول لمامته وهو مروح i want to live with cocca علشان كدة ما رضيتش اعمل حضانة خفت العيال ما ترضاش تروح حبيبي انا اللي عايزة اعيش العب طول الوقت هي بس الصحة اللي مش مساعداني بعد ساعتين استغماية واني استخبى تحت الترابيزة ووراء الباب بابقى خلصت خلاص وعايزة اقعد احط رجلي في مياه سخنة واقول اه يا رجلية اه يا كلاوية # انا_فين # انا_تحت_السرير # لا_ده_انا_تحت_السن

انا النهاردة كنت في مؤسسة اصدقاء فرانكو بازاليا مع حبيبتي وصديقتي وقريبتي ايمان سرور رئيس مجلس ادارة المؤسسة شفت انتاج المؤسسة والصراحة ما بقيتش عارفة اجيب ايه والا ايه الفن بيشع منهم ان شاء الله حيعملوا معانا في المركز اللي في النجع احلى شغل اتفقنا اننا نحدد المنتج وبعدين نحدد يتعمل ازاي وبعدين نتقنه وبعدين نعمل منه وحدة انتاجية وبعدين نسوقه وبعدين نعمل للناس دي وحدة لهم يعتمدوا على نفسهم فيه ا طبعا اللي باقوله مش انا اللي مخترعاه على الرغم انه كان رغبتي من عشر سنين ولكن الايطاليين عملوه من عشرات السنين وطبقوه على المرضى النفسيين وعملوا شركات لهم ببرنامج اللي بتحطه اصدقاء فرانكوا بازاليا النهاردة يوم جميل رحت علشان احتفل معاهم بعيد انشاء المؤسسة وانتهت اني اخذت الناس وعلمتها تاتينج بقيت لماهم حوالي زي الكتاكيت وكان ناقص يكرشوني من المؤسسة علشان الاحتفالية تحولت لدرس خصوصي ان شاء الله حنعمل مع بعض احلى ورشة موازييك فيكي يا مصر ادعولهم وادعولنا

في الهوميوباثي قالك ان ربنا سبحانه وتعالى نزلنا ببرنامج نشتغل عليه يحقق هدف وجودنا وفي الغالب بيكون هدف بناء وكلما حقق الجسد سبب وجوده كلما كان بصحة جيدة وان الروح التي انزلت تعطي اوامرها للقوة الحيوية للسيطرة على الجسد والعمل على ان يتواصل كله بتناغم لتحقيق هذا البرنامج وان اي حيود عن البرنامج يجعل القوة الحيوية تمرض اي تحيد عن حالتها المنظمة وتبدأ في الاضطراب الذي يسبب المرض الجسدي الذي يتحدث ع نه الطب وان كل قوة حيوية تعلم مقدار ما تستطيع ان تسيطر عليه حسب الجسد الذي تعمل عليه وبالتالي ليس كل انسان بقادر على ان يعمل مثل الاخر هانيمان ده ناقص يقول لي كل ميسر لما خلق له وان ربنا خلقنا لنرث الارض ونصبح خلفاء ده بيدل على ان الانسان اذا فهم صح حيرجع للفطرة بتاعة ربنا اللي نزلنا بيها وهي البرنامج اللي بيتكلم عليه والله بدأت احبك يا هانيمان مع اني كنت مش قادرة احبك من مدة علشان اللخبطة اللي حاططها في دماغي لكن اللي بتقوله في الاورجانون بتاعك ممخمخني خالص # باحبك_ياهانيموني_مهما_الناس_لاموني # الفقرة_التاسعة_لقانون_الهوميوباثي # الله_ينور_يا_كنت_زي_ما_بتنور

النهاردة عايزة اكلمكم على الدين والصلاة بس خليكم معايا للآخر الدين هو هيكلك العظمي و الصلاة زي الصوابع ما ينفعش امسك حاجة وما ينفعش اشاور ولا اسند من غير ايدي ولو ايدي عاجزة حاجات كثيرة مش حاعرف اعملها وده بالتاكيد يغير من سلوكي الصباع الكبير الابهام هو صلاة الصبح وهو الكبير اللى ما ينفعش تمسك حاجة من غيره و الصوابع التانة بتخدم عليه السبابة هو صلاة الظهر وهو اللي بيه بتحدد هدفك لانك بيه بتشاور صلاة العصر هو الصلاة الوسطى وهو الاقوى والاطول وهو اللي بيلف على الحاجة اللي بتمسكها يعني الدعم والقوة صلاة المغرب هي الصباع الارتباط اللي بتحط فيه دبلتك وهو اللي بيه ماسك في الدنيا ومحافظ على الاحبة والصباع الصغير هو صلاة العشاء اللى من غيره تفلت الحاجات هو اللي بيقفل الدائرة و ما تتسربش منك الحاجة ما تفتكرش انك لو مش بتصلي الحياة حتبقى كاملة عندك الصلاة بتكملك وبتحافظ عليك وبتحدد هدفك حافظ على صلاتك تحافظ عليك صلاتك وصباح البركة

مرة لما كنت في سلطنة عمان وقت ما كان جوزي معار في جامعة السلطان قابوس وكنا في عزومة كبيرة وفيها ناس خواجات كتير ومنهم واحدة انجليزية قاعدة تتكلم عن مصر والمصريين لانها عاشت فترة واهلها كانوا في مصر ايام الملك كان كلامها كله ان مفيش مصري بيستريح الا في مصر المصري مهما كان في اي بلد بيرجع ياخد نفسه في مصر اياميها كنت لما اتفرج على فيلم مصري واشوف التاكسي الاصفر بتاع اسكندرية اللادا او الفيات 131 بتاع زمان كنت بابقى زي الطفل اللي عايز ياخد حضن مامته انا فترات كتيرة في حياتي مكنتش في مصر لكن مصر كانت في كل يوم مصر بتعطيني متر فوق طولي وعمرين فوق عمري العائلة المصرية هي اللي مش موجودة في اي حتة في العالم الام المصرية والخالة المصرية والعمة المصرية والجدة المصرية والاب المصري والصاحب المصري والصاحبة المصرية والجارة المصرية والجار المصري ومرات الابن المصرية وجوز البنت المصري احنا موزاييك مصري مفيش زيه