طفلة للابد

اللي قتل مش بس اللي داس على الزناد وعمر السلاح اللي قتل لكن القاتل كل اللي خطط له واللي دفع ثمن السلاح واللي جاب الطلقات واللي وصلهاله واللي مرنة ودربة واللي كان عارف انه حيقتل وما قالش بلاش او منعه يا جماعة الارهاب مش واحد قتل الارهاب منظومة ممكن يكون واحد زي الفل وممتاز لكن مؤيد ومساند ودافع أو ممكن يكون على الاقل شيطان اخرس مش بيقول لا

مر عام بخيره وشره وحلوه ومره ولكنه كان كـأي ايام الله كلها جميلة فمن غير المرار ما شعرنا بالحلاوة بدأتها وجلة مريضة وانهيتها سعيدة وبصحة مر فيها اياما كان قلقي يشعرني بأن قلبي يخرج من بين ضلوعي ومرت فيها ايام السعادة تكاد تخرجه من ضلوعي شعرت فيها ان الله داعم لكل انسان توكل عليه حق توكل شعرت فيها بدفء الاسرة ونعومة العائلة وشعرت ايضا بحب الاصدقاء وقربهم من قلبي دعوت لمرضى فشفيوا ولله الحمد وتمنيت للبعض الشفاء وتوفاهم الله في مكان افضل مما كانوا فيه مرت بلدنا خلال العام بتحديات كثيرة تمنيت الا تتواجد والا يجعلها فتنة لنا ولكن اراد الله ولا راد لارادته على قدر ما تم محاولة تحويل اعمال الخير وممانعتها لكن الله اراد لها ان تتجه الى الطريق الصحيح فانضممنا الى مؤسسة اشهد وعم الخير لقرى في البحيرة كانت منسية والحمد لله تمكنت ان تستقبل الشتاء بلا خوف ولا ذل مستبشرة خير ان شاء الله للسنة الجديدة واتمنى من الله ان يجعلها اجمل واهدأ من العام السابق وان ينال خيره اكبر عدد من الاسر الفقيرة وان يرد كيد الكائدين وحقد الحاقدين ويملأها بركة عليكم كلكم

ساعات تحس ان فيه واحد ما عرفش يعمل انجازات في حياته يتمنظر بيها على خلق الله يروح رايح ماسك نادي ويقولك انا مشجع النادي ده ويبقى كل كلامه وحركاته وانجازاته انه من مشجعي ريال مدريد وساعات بيزودها قوي زي ما يكون هو اللي شاري اللعيبة ومدربهم من جيبه مبروك لكل اللي بيكسب يا جماعة بس لازم يكون عندنا حاجة بنعملها تانية على راسي والله انت مشجع لأجدع نادي على وجه الارض والنادي بتاعك بيحقق اعلى نتيجة في تاريخ البشرية خلص الانجازات بقى وتعالالي على جنب كدة نتفاهم انت عملت ايه غير كدة

فكرة من غير خطة تنفيذ بتبقى زي الزغطة كدة لا استفدت ومنها ولا بتهضم اديسون كان عنده الف خطة ونفذها وعرف واحدة بس انها تنفع للتطبيق يعني الناس في مصر بتفكر كتير وتطلع افكار برة الصندوق وجوة الصندوق لكن المهم التنفيذ والتطبيق كل ما تطلعلك بفكرة حلوة اقعد شوف حتتنفذ ازاي وبعد ما تفكر في طريقة التنفيذ ابتدي دور على وسيلة تطبيق التطبيق هو اللي بيخلي الفكرة اللي في دماغك حلوة ونافعة فيما عدا ذلك فهي زغطة عمالة تعمل صوت ومضايقاك ومش عارف تسكتها

علاقتنا بالسعودية علاقة وطيدة وبالتأكيد هناك من يريد ويستطيع ان يقف بيننا وبينهم وقد نجح اوراق الاختلاف موجودة وتفعل حين يريدون الصهاينة يخططون ويعملون جيلا وراء جيل يعلمون اننا لا نتفاهم لا نتحدث بعقلانية ولا بموضوعية لم نعتاد على الاختلاف والمناقشة هم يظهرون ما يريدونه حين يريدون ونحن نتفاعل بعاطفية وبكل رعونة اخي العربي احبك وسأظل الاخ الاكبر لكل العرب وستظل هاجر هي الام لا تدع قضايا سياسية تقف بيننا وبين بعضنا البعض اخي المصري لا تكن الرصاصة التي يقذفها الصهيوني لتحدث صدعا في كيان صداقتنا لا تستخدم الالفاظ واللمز والهمز على اي من اخوتنا العرب اعلم انك ساخر وانت تسخر من نفسك قبل ان تسخر من الاخرين ولكن الله لا يحب اللمز والهمز والسخرية فتعقل حين تتحدث عن ملفات شائكة وضعت امامك لكي تتهيج الشعوب ونصبح في النهاية كالذئاب ننهش في بعضنا البعض ويضحك العدو

فيه حاجات لازم تحرم ابنك منها وفيه حاجات ما ينفعش تحرم ابنك منها ابدا لانه مش حيعرف يجيبها بعدين يعني لو قالك انا عايزة اغلى جزمة قل له لا يا حبيبي اتعلم انك تجيب اللي تستخدمه مش اللي تتمنظر بيه لو قالك عايز عجلة وهو ما عندوش مكان يلعب بيها قل له حاجيبهالك لما تعرف تستخدمها لو قالك عايز عربية اروح بيها الكلية قل له حاضر لو تقدر ولو ضروري ولا لو مش حتقدر او لو يقدر يروح بحاجة تانية بس لو قالك هات حضن عمرك ما تقول له لا هو مسيره يكبر ويجيب لنفسه العربية والعجلة ولكن مش حيعرف يجيب الحضن الحنان الاسري والدفء في العواطف شيء لا يمكن ان يتعوض في الحياة الشخص ناقص الحنان بيكون اما مكسور واما جاحد ارجوكم اعطوا اولادكم كل الحنان المطلوب ولكن الماديات اقف وقفة جامدة وقل له لا لو مش قادر