رضينا بالهم والهم مش راضي بينا

-

 رضينا بالهم والهم مش راضي بينا

نظرا لأني امرأة تعمل فلازم يكون معايا مساعدين
مش المساعدين بتوع العربية لا ابسلوتلي بالعكس مساعدين بتوع المطبخ اقصد سيدة تساعدني في المنزل وبالطبع ده مشكلة كبيرة تعاني منها الأسر المنتجة وحتى المش منتجه
هذه السيدة هي امرأة تخرج من بيتها لتساعد امرأة اخري في بيت امرأة اخرى مقابل المال وهو عمل شريف لكن للأسف معظم وان كان كل السيدات يعتبرنه سبة وشتيمة وعيب وما يصحش وكلهن يدارين عملهن لان ياخرابي لو جوزي عرف والا لو جوز بنتي والا الجيران وكان الفلوس اللي بتقبضها دي بتنزل من السما
مذكراتي مع احدى السيدات كما يلي
اول يوم جت الصبح وقلت لها حضري لنا الفطار لو سمحتي
ورحت أغير عشان أفطر أنا والأولاد وقبل ما أوصل الاوضة لقيتها بتقول خلاص
قلت دي لهلوبة على كدة
رحت أوضة السفرة لقيت طبق فول وكام رغيف عيش
الله ايه يا ستي فين الأطباق والملاعق والسكاكين والجبنة والعسل والمربى والبيض
ووريتها ان سفرة الإفطار لازم تتوضع ازاي
بعد حوالي ساعة لقيت واحدة بتنادي بصوت جهوري
حمااااادة حمااااااادة
جريت لها
فيه ايه ومين حمادة
قالتلي
بنادي عليكي، عايزاني اعمل ايه
قلت لها روحي على الحمام وتبتدئ بيه
دخلت الحمام ورجعت تقول لي
أجيب الميه منين
قلتلها من الحمام أكيد ما الحمام فيه ميه
بعديها وقفت معاها افهمها ان الكنس له مكنسة وان الموبيليا لها فوطة وان المسح له خيشة
قالتلي طب ومين حيمسح الارض
انا في البيت بناتي بتمسح لي الارض
قلتلها كنتي جبتيهم معاكي يا شيخة
بعد شوية قلتلها ممكن تحضري الغدا وكان الحمد لله فيه اكل
وقلت اسبق واقولها
حطي الاطباق والشوك والمعالق والسكاكين وسخني الاكل
قالتلي باندهاش
اطباق تاني ما تاكلوا من الحلة
المهم ان اليوم ده عدى على خير
تاني يوم جاءت وانا رحت الشغل ورجعت لقيت بنتي بتجري علي وتقول لي ماعرفتش اذاكر ولا كلمة
قلتلها ليه
قالتلي الست اللي عندنا كل شوية تقول لي انتي قاعدة تذاكري وسايباني لوحدي
قالتلها وانا مالي انا عندي مذاكرة
قالتلها عيب تكلمي طنط كدة ولازم تساعديها
ابني قال لي يا مامي الست دي بتخوفني
قلتله ليه يا حبيبي
قال لي بتقف قدام الاوضة اول ما اعدي تقول لي انت ماشي من غير ما تسلم ولا صباح الخير
وانا عارفة ان ابني بياخد بتاع حبتين وحتة على ما يعرف هو فين
ولقيتها بتقول لي
انا كنت حارمي نفسي من البلكونة
ليه كفى الله الشر
انا دخلت اوضة ابنك لقيت اللحاف على الارض اتخضيت
كنت حاجري ارمي نفسي من البلكونة
سألت محمد
انت حطيت اللحاف ليه على الارض يا بن الحلال
قال لي قلتلها شيليه علشان الدنيا حر
سابته
قلتلها انا مش عايزه
سابته
حطيته على الارض
لقيتها بتصرخ في البيت وتصرخ وتصرخ
كلمت عمتي علشان تخليها تسكت
انا قلت ما بدهاش
الست دي مش حتعيش بالشكل ده
وانا في الشغل مش قادرة ابقى متابعة
رحت اشوفها فين
المهم ان انا لما دخلت المطبخ لقيتها ماسكة كتاب وورقة وعمالة تقرا وتذاكر
قلتلها بتعملي ايه
قالتلي اصل لازم عشان اشتغل في مدرسة يكون معايا محو امية وانا عايزة امتحن عشان ربنا يتوب علي من الشغلانات اللي في البيوت اللي زيكم
قلتلها خلاص روحي ذاكري في بيتكم وسيبك مني خالص لان مش حينفع نكمل مع بعض
بصت باحتقار شديد لي وللاولاد وللبيت وقالت
صحيح رضينا بالهم والهم مش راضي بينا
وخرجت من البيت وضحك الجميع وعشنا في تبات ونبات

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد